RHAGAIR

Mae’n bleser mawr gennym gymeradwyo’r Cynllun Datblygu Unedol hwn i gyhoedd Bwrdeistref Sirol Pen-y-bont ar Ogwr.

Mae’n rhan bwysig iawn o bolisïau corfforedig Cyngor Bwrdeistref Sirol Pen-y-bont ar Ogwr ac mae’n gosod allan cyfarwyddyd am ddefnyddio tir ledled ardal yr Awdurdod tan 2016, er mwyn rhoi sicrwydd i’r cyhoedd a datblygwyr.

Mae’r cynllun yn bwysig hefyd wrth benderfynu ar geisiadau cynllunio. Yn ôl y gyfraith, hwn fydd y prif ffactor i’w ystyried. Bydd penderfyniadau sy’n seiliedig ar y cynllun yn effeithio ar bawb yn yr ardal.

Mae’r cynllun wedi bod yn destun ymgynghoriad cyhoeddus helaeth drwy arddangosfeydd, seminarau lleol a chyfarfodydd cyhoeddus ym mhob rhan o’r Fwrdeistref Sirol. Yn ychwanegol, clywodd yr ymchwiliad cyhoeddus i’r cynllun bron i 2,000 o sylwadau. Gwnaed newidiadau sylweddol i fersiwn gyhoeddedig 2001 i adlewyrchu’r materion a godwyd ac argymhellion Arolygydd yr Ymchwiliad a dderbyniwyd gan y Cyngor.

Dyma’r cynllun cyntaf i’r Fwrdeistref Sirol i gael ei osod yn amlwg yng nghyd-destun Agenda 21 Leol. Mae llawer o’r polisïau’n adlewyrchu nodau datblygiad cynaliadwy. Credwn mai Cymru yw’r genedl gyntaf dan ddyletswydd statudol i ystyried y materion hyn yn ei phrosesau gwneud penderfyniadau ac maent wedi cael ystyriaeth lawn wrth baratoi’r ddogfen hon sydd wedi bod yn destun gwerthusiad cynaladwyedd neu ‘archwiliad gwyrdd’.

Mr. Rhodri-Gwyn Jones Cyfarwyddwr Gwasanaethau Amgylcheddol a Chynllunio	Y Cynghorydd Patricia Hacking Aelod Cabinet Amgylchedd, Cynllunio, Priffyrdd a Thechnegol	Mr. Martin Hooker Cyfarwyddwr Cynorthwyol Gwasanaethau Cynllunio

<< Pennod flaenorol | Pennod nesaf >>