13.1. Cyfiawnhad o Bolisi Rhan 1
13.1.1. Lle mae gwybodaeth berthnasol ar gael, dylai'r cynllun datblygu
nodi ardaloedd lle mae angen ystyried ansefydlogrwydd tir i sicrhau na
fyddai datblygiad newydd mewn perygl o ymsuddiant, gollyngiadau nwy o waith
glo a chladdu sbwriel, tirlithriadau a chreigiau'n cwympo, nad yw datblygiad
yn digwydd mewn lleoliadau ansefydlog neu lle byddai gofyn am waith
peirianneg cyhoeddus drud i ddiogelu'r datblygiad. Lle mae ansicrwydd
ynghylch sefydlogrwydd, cyfrifoldeb y datblygwr fydd penderfynu ar
oblygiadau'r cyfyngiadau hyn.
Rhan 2
13.2. Cyflwyniad
13.2.1. Gall tir ansefydlog gael ei achosi gan brosesau naturiol neu a
wnaed gan ddyn. Y ffurf fwyaf cyffredin o dir naturiol ansefydlog yw
tirlithriadau. Mae erydiad arfordirol yn cyfrif am beth ansefydlogrwydd mewn
rhai ardaloedd o'r DU ond, yn ffodus, nid oes enghreifftiau penodol o hyn yn
y fwrdeistref sirol. Gall achosion naturiol eraill gael eu hachosi gan
gynnydd neu ostyngiad mewn dŵr daear, cywasgiad tir o ganlyniad i waith
claddu sbwriel a thywydd eithafol.
13.3. Tir Ansefydlog yn y Fwrdeistref Sirol
13.3.1. Yn y fwrdeistref sirol, lleolir yr ardaloedd mwyaf ansefydlog
mewn ardal i'r gogledd o linell a dynnir rhwng Garth, Maesteg a Chwm Ogwr.
Yn gyffredinol, mae'r tirlithriadau hyn yn amrywio o ran maint a natur ac
rydym yn ffodus bod y rhan fwyaf yn weddol bell o ardaloedd anheddu. Fodd
bynnag, mae rhai tirlithriadau'n gorgyffwrdd â rhai ardaloedd â thai a
gallent achosi difrod i eiddo. Rhaid pwysleisio fodd bynnag na fydd fawr o
symudiadau rheolaidd ar y rhan fwyaf o'r ardaloedd hyn.
13.3.2. Er mwyn gwneud y mwyaf o dir ar gyfer datblygu, mae'n hanfodol
ystyried cyfyngiadau corfforol y tir wrth gynllunio bob amser. Rhaid
archwilio unrhyw bosibilrwydd o fesurau adfer, ataliol neu ragofalus hefyd
er mwyn peidio â sterileiddio'r tir yn ddiangen.
13.3.3. Mae'n bwysig cydnabod mai cyfrifoldeb y datblygwr yw penderfynu
ar faint ac effaith yr ansefydlogrwydd neu unrhyw risgiau eraill. Rôl y
Cyngor yw amlygu unrhyw risg hysbys neu bosibl er mwyn i unrhyw ddatblygiad
gael ei gyflawni mewn ffordd ddiogel ac amgylcheddol dderbyniol.
13.3.4. Os na ellir goresgyn ansefydlogrwydd yn foddhaol, gall y Cyngor
wrthod caniatâd cynllunio. Ar y llaw arall, gellir rhoi caniatâd yn amodol
ar amodau ac mae'n bosibl y bydd raid i'r datblygwr wneud gwaith ymchwilio,
asesu a lleddfu arbenigol.
13.3.5. Gellir cael cyfarwyddyd am ddatblygiad sy'n effeithio ar dir
ansefydlog yn y Nodyn Cyngor Technegol drafft (NCT) - Cymru, dyddiedig
Tachwedd 1996 ac yn rhannau o Nodyn Cyfarwyddyd Polisi Cynllunio Rhif 14
(1990).
13.3.6. O ystyried y blaenorol, ystyrir bod y polisi canlynol yn briodol
ar gyfer cynigion sy'n effeithio ar dir ansefydlog yn y fwrdeistref.
13.3.7. CYNIGION DATBLYGU AR DIR ANSEFYDLOG
POLISI UNS1
LLE MAE CYNIGION YN EFFEITHIO AR DIR LLE TYBIR BOD Y TIR YN ANSEFYDLOG,
RHAID I UNRHYW GAIS CYNLLUNIO GYNNWYS ADRODDIAD SEFYDLOGRWYDD SY'N:-
1. NODI AC ASESU FAINT O ANSEFYDLOGRWYDD SYDD;
2. NODI'R MESURAU SYDD EU HANGEN I LEDDFU YN ERBYN UNRHYW RISG A NODIR YN 1
(UCHOD);
3. MANYLU AR FONITRO CYSON LLE'N BRIODOL; AC SY'N
4. YMDRIN Â'R ANGEN AM ASESIAD AMGYLCHEDDOL FFURFIOL YN DEILLIO O UNRHYW
WAITH SEFYDLOGI.
<<
Pennod flaenorol |
Pennod nesaf
>> |
