2. CYFLWYNIAD RHAN 2

2.1. Datblygiad Cynaliadwy

2.1.1. Cefnogwyd y cysyniad o 'ddatblygiad cynaliadwy' ar y lefel uchaf gan y rhan fwyaf o lywodraethau'r byd ac mae'n dylanwadu'n fawr ar bolisïau'r Cynllun Datblygu Unedol hwn. Diffinnir datblygiad cynaliadwy fel arfer fel datblygiad sy'n bodloni anghenion y presennol heb beryglu gallu cenedlaethau i ddod i fodloni eu hanghenion nhw. Hynny yw, mae'n ymwneud â sicrhau gwell ansawdd bywyd i bawb, nawr ac ar gyfer cenedlaethau i ddod.

2.1.2. Mae i ddatblygiad cynaliadwy oblygiadau eang ac ni chyfyngir ef i ddiogelwch amgylcheddol yn unig. I'w gyflawni, rhaid bodloni pedwar nod ar y cyd, sef:-

• Yr angen am gynnydd cymdeithasol sy'n cydnabod anghenion pawb;
• Yr angen am ddiogelwch amgylcheddol effeithiol;
• Y gofyn am ddefnydd doeth o adnoddau naturiol;
• Y pwysigrwydd o dwf economaidd a chyflogaeth.

Er yr ymdrinnir â'r cysyniad o ddatblygiad cynaliadwy a sut y datblygodd fel egwyddor hollbwysig yn fanylach yn y bennod am yr amgylchedd (cyfeirier at adran 3.3), mae pob pennod yn ymdrin ag amcanion cyffredinol y cysyniad yn eu tro.

2.1.3. Mae Cyngor Bwrdeistref Sirol Pen-y-bont ar Ogwr yn cefnogi'r cysyniad o ddatblygiad cynaliadwy'n llawn ac mae'n nod pwysig yn y Cynllun Datblygu Unedol hwn i fantoli ac integreiddio'r nodau uchod wrth gynnig datblygiad newydd. Yn y cyd-destun hwn, egwyddor arweiniol y Cynllun Datblygu Unedol yw:-

GWELLA ANSAWDD BYWYD TRIGOLION BWRDEISTREF SIROL PEN-Y-BONT AR OGWR SY'N CYD-FYND AG EGWYDDORION DATBLYGIAD CYNALIADWY.

2.1.4. Cefnogwyd yr egwyddor hon yn y Strategaeth Defnydd Tir a gynhyrchwyd fel cefndir i'r CDU. Troswyd hi i nifer o nodau mwy penodol ar gyfer pob maes pwnc yn y cynllun. Mae'r nodau fel a ganlyn:-

2.2. Amcanion a Nodau

2.2.1. Amgylchedd

• Parhau i ddiogelu cefn gwlad er mwyn ei dirwedd, adnoddau naturiol a chadw a gwella ei werth amaethyddol, ecolegol, geolegol, ffisiograffig, hanesyddol, archeolegol a hamdden;
• Hybu a chadw bioamrywiaeth y fwrdeistref siorl ac annog rheolaeth o nodweddion y dirwedd sy'n bwysig iawn i'r fflora a ffawna gwyllt, ar y cyd â chynllun gweithredu bioamrywiaeth lleol cymeradwyedig y Cyngor;
• Ceisio gwella'r economi wledig drwy ystyried yr angen i gynnal sector amaethyddol dichonol;
• Diffinio a darparu fframwaith polisi cyd-drefnedig er mwyn parhau i gynllunio a rheoli ardal arfordirol y fwrdeistref sirol yn ei chyd-destun rhanbarthol;
• Gwella ymddangosiad yr amgylchedd adeiledig a gwella ansawdd datblygiadau newydd;
• Diffinio, diogelu, cynnal a gwella'r amgylchedd hanesyddol adeiledig h.y. hen gofebion, safleoedd archeolegol, adeiladau rhestredig, ardaloedd cadwraeth, parciau, gerddi a thirluniau hanesyddol y fwrdeistref sirol.

2.2.2. Tai

• Darparu ar gyfer anghenion tai dyfodol y fwrdeistref sirol drwy nodi digon o dir i adeiladu 9950 o anheddau rhwng 1996 a 2016 yn gyson â'r egwyddor o ddatblygiad cynaliadwy;
• Diwallu ar gyfer ystod ddigonol o dai drwy gydlynu canlyniadau'r Strategaeth Tai ac Arolwg Anghenion Tai 2002 a fydd yn nodi anghenion lleol a chymdeithasol penodol;
• Hybu adnewyddiad trefol drwy annog y defnydd o safleoedd tir llwyd ac adeiladau presennol ar gyfer tai newydd.

2.2.3. Cyflogaeth

• Hybu cydraddoldeb a chyfle drwy gynnig hawl mynediad i gyfleoedd gwaith i'r holl drigolion, yn briodol i'w sgiliau;
• Hybu defnyddio a throsi safleoedd tir llwyd priodol ac adeiladau gwag neu na ddefnyddir ddigon ar gyfer datblygiadau diwydiannol a masnachol;
• Sicrhau bod digon o dir ar gael i fodloni gofynion swyddi'r boblogaeth ac anghenion amrywiol diwydiant, ger cymunedau preswyl presennol ac arfaethedig lle'n bosibl;
• Sicrhau bod cyflenwad digonol o dir sy'n hawdd ei ddatblygu ar gael drwy gynnal banc tir;
• Cyfoethogi'r economi drwy ddiogelu swyddi presennol o ran safleoedd a chyfleoedd a sicrhau buddsoddiad newydd;
• Datblygu manteision lleoliad coridor yr M4 drwy neilltuo safleoedd ger ffyrdd strategol at ddibenion cyflogaeth arbennig.

2.2.4 Cludiant

• Mabwysiadu ymagwedd rheoli'r coridor at ddatblygu a gwella'r rhwydwaith cludiant cyfan;
• Diogelu a gwella'r amgylchedd drwy gyflwyno amrywiaeth o fesurau cludo a thraffig sy'n lleihau defnydd o'r car ac sy'n annog beicio a cherdded;
• Cyfyngu parcio dibreswyl preifat mewn lleoliadau priodol fel rhan o'r strategaeth i leihau'r defnydd o'r car;
• Annog y defnydd o gludiant cyhoeddus fel prif ffordd o deithio, yn enwedig ar gyfer teithio i'r gwaith, drwy ddatblygu rhwydwaith cludiant eang;
• Annog datblygiadau i symud i ardaloedd lle mae gan bob rhan o'r gymuned fynediad cyfartal.

2.2.5. Manwerthu

• Lleihau lefel uchel y gwariant ar nwyddau cymharol i ganolfannau tu allan i'r fwrdeistref sirol;
• Diogelu'r hierarchaeth fanwerthu bresennol;
• Diogelu a gwella dichonoldeb, dymunoldeb a ffyniant trefi a dosbarthiadau'r fwrdeistref sirol;
• Hybu ffyrdd eraill o deithio ar gyfer siwrneiau siopa;
• Hybu rôl canolfannau siopa llai a siopau annibynnol lleol yn y fwrdeistref sirol;
• Hybu a diogelu cyfleoedd siopa sy'n agos i ardaloedd preswyl.

2.2.6. Twristiaeth a Hamdden

• Mantoli ac integreiddio anghenion twristiaeth, cymunedau a'r amgylchedd, gan gynnwys cefnogi eco-dwristiaeth, tra'n diogelu ardaloedd sy'n amgylcheddol sensitif;
• Annog datblygiad llety o ansawdd uchel ar gyfer twristiaid a'r farchnad fusnes mewn lleoliadau priodol, gan gynnwys uwchraddio a gwella'r cyfleusterau presennol;
• Annog datblygiadau twristiaeth a hamdden sy'n amgylcheddol gynaliadwy yn ac o gwmpas Pen-y-bont ar Ogwr a choridor yr M4. Dylid cysylltu hyn â gwelliannau i gyfleusterau a gweithgareddau twristiaeth, hamdden a diwylliannol yng nghanol trefi'r fwrdeistref sirol. Gellir gwireddu hyn drwy weithredu cynigion a geir yn yr amryw strategaethau adfywio, yn enwedig y strategaethau ar gyfer trefi Pen-y-bont ar Ogwr, Maesteg a Phorthcawl;
• Cefnogi gwaith gwella a datblygu Porthcawl fel pen taith o bwys, drwy weithredu'r Strategaeth Adfywio Pen Taith Porthcawl.

2.2.7. Chwaraeon a Hamdden

• Adfer y diffygion presennol yn y ddarpariaeth o gyfleusterau hamdden lle mae'r rhain yn cyd-fynd â gwarchod yr amgylchedd trefol a gwledig;
• Diogelu'r cyfleusterau hamdden presennol yn erbyn datblygiad amhriodol ac annog y cyhoedd i'w defnyddio fwy;
• Darparu'r ystod ofynnol o gyfleusterau hamdden mewn mannau sy'n hawdd mynd atynt yn y fwrdeistref sirol, sy'n cydweddu â gwarchod yr amgylchedd trefol a gwledig ac sy'n unol â Strategaeth Cefn Gwlad y Cyngor.

2.2.8. Cyfleusterau Cymdeithasol a Chymunedol

• Darparu'r ystod ofynnol o gyfleusterau cymdeithasol a chymunedol ar draws ardal y cynllun, gan gydweddu â gwarchod yr amgylchedd trefol a gwledig.

2.2.9. Mwnau

• Darparu'n ddigonol ar gyfer cynhyrchu agregau i fodloni cyfraniad presennol y fwrdeistref sirol i alw rhanbarthol;
• Sicrhau defnydd effeithiol a phriodol o fwnau agregau drwy annog y defnydd o ddefnyddiau eilaidd ac ailgylchedig yn lle prif agregau;
• Darparu digon o dir i sicrhau cyflenwad parhaus o garreg galch bur iawn ar gyfer y farchnad ddiwydiannol nad yw'n ymwneud ag agregau;
• Gweld a oes yna safleoedd sy'n amgylcheddol dderbyniol ar gyfer gwaith glo brig ac y byddai o fantais i'r gymuned leol.

2.2.10. Cael Gwared ar Wastraff

• Darparu ar gyfer ystod o gyfleusterau rheoli a chael gwared ar wastraff yn unol â'r nodau a osodir allan yn Strategaeth Gwastraff Genedlaethol Cymru a gyhoeddwyd ym mis Mehefin 2002.

2.2.11. Tir Ansefydlog

• Peri i'r cyhoedd a datblygwyr fod yn ymwybodol o natur tir ansefydlog yn y fwrdeistref sirol drwy ddefnyddio'r gronfa ddata sydd ar gael;
• Mwyhau defnydd o'r tir hwn drwy fodloni'r angen i sicrhau y nodwyd yr holl gyfyngiadau corfforol, gan gynnwys y posibilrwydd o fesurau adfer, ataliol neu ragofalus, lle'n briodol.

2.2.12. Ynni a Gwasanaethau Cyhoeddus

• Cynyddu effeithiolrwydd ynni drwy gynllunio datblygiadau'n briodol, gan ystyried nodweddion fel cynllun, cyfeiriad, defnydd cymysg, dwysedd datblygiad, defnyddiau a thirlunio.
• Sicrhau y bodlonir anghenion rhesymol y fwrdeistref sirol am ynni a gwasanaethau cyhoeddus ac y gwneir y mwyaf o botensial ynni'r ardal o ffynonellau adnewyddu lleol a defnydd dŵr, yn gyson â'r angen i ddiogelu'r amgylchedd.

2.2.13. Adfywio

• Diogelu buddsoddiad blaenorol, yn arbennig mewn ardaloedd trefol, darparu mwy o sicrwydd ar gyfer buddsoddiad yn y dyfodol a chefnogi sector adfywiad yr economi;
• Gwella ansawdd isadeiledd y fwrdeistref sirol, gan gynnwys ei hadeiladau ac ardal gyhoeddus;
• Nodi a darparu fframwaith defnydd tir er mwyn ymdrin ag anghenion cymdeithasol a'u blaenoriaethu;
• Cefnogi datblygiad cymunedol, cael gwared ar eithriad cymdeithasol a lleihau troseddu;
• Gwneud defnydd gwell o adnoddau fel tir ac adeiladau, lleihau'r angen i deithio, helpu i gael gwared ar ddirywiad trefol, hwyluso effeithiolrwydd ynni, gwella bioamrywiaeth a lleihau pwysau ar gefn gwlad;
• Ysgogi mwy o gyfranogiad a pherchnogaeth gyhoeddus o benderfyniadau cynllunio a rhoi canolbwynt i weithgareddau cymunedol;
• Helpu i wella sgiliau addysg a gwaith.

2.2.14. Gweithredu, Adnoddau a Monitro

• Mwyhau'r defnydd o'r adnoddau sydd ar gael i weithredu'r cynllun;
• Monitro a gwerthuso'r CDU er mwyn hysbysu'r gymuned, defnyddwyr y cynllun a'r awdurdod cynllunio o effeithiolrwydd y polisïau a chynigion a rhoi mewnbwn i'r arolwg a diwygiad olynol.

2.3. Strategaeth Defnydd Tir

2.3.1. Rhan ganolog o'r Strategaeth Defnydd Tir, a gynhyrchwyd fel cefndir i'r CDU hwn, oedd amcangyfrif y gofyn am anheddau yn y dyfodol a newidiadau mewn tai yn y fwrdeistref sirol, sydd, yn ei hanfod, yn rhagolwg o'r boblogaeth. Mae datblygiadau tai yn a bydd yn parhau i fod yn brif ddefnyddwyr tir. Mae'n briodol i roi ystyriaeth fanwl i'r mater hwn felly.

2.3.2. Mae poblogaeth yr ardal wedi tyfu'n barhaus yn y 30 mlynedd ddiwethaf yn gyffredinol. Nid yw'r twf wedi bod yn gyson gan fod y lefelau a gofnodwyd yn y 1960au'n uwch nag unrhyw dyfiant dilynol. Ers y 1960au pan gynyddodd poblogaeth yr ardal dros 11%, mae'r gyfradd wedi bod yn fwy cymedrol. Fodd bynnag, mae poblogaeth yr ardal wedi parhau i dyfu ac, yn gyffredinol, tyfodd y boblogaeth oddeutu 19% rhwng 1961 a 2001.

2.3.3. Wrth wraidd y strategaeth defnydd tir yw tybiaeth y bydd y rhan fwyaf o'r safleoedd tai a ddyrannwyd yn y cynllun datblygu blaenorol yn cael eu datblygu yn ystod bywyd y cynllun h.y. hyd at 2006. Fodd bynnag, cydnabyddir bod gan rai o'r safleoedd broblemau isadeiledd, topograffegol a llygredd a allai gyfyngu eu datblygiad. O ganlyniad, mae'r Cyngor Bwrdeistref Sirol wedi ailasesu'r banc tir preswyl ac wedi eithrio rhai safleoedd yr ystyrir na fyddant yn debygol o gael eu datblygu yn y cyfnod hyd at 2016. Ar yr un pryd, er mwyn gwneud yn iawn am golli'r safleoedd hyn, cynhwyswyd dyraniadau newydd sydd â mwy o botensial datblygu. Ceir esboniad llawnach o'r broses hon, ynghyd â rhestr fanwl o'r safleoedd newydd hyn, yn y bennod am dai yn ail ran y cynllun hwn.

2.3.4. Cynhyrchwyd y rhagolwg poblogaeth ar gyfer y cynllun drwy ddefnyddio Model Poblogaeth a Chartrefi Chelmer. Seilir y data craidd ar gyfrifiad 1991 er y diwygiwyd y model i gynnwys ffactorau cywiro lleol 1998 ar gyfer genedigaethau, marwolaethau a mewnfudo. Yn ychwanegol, cynhwyswyd cyfraddau ffrwythlondeb a marwolaethau 1998. Cynhyrchwyd y rhagolwg drwy fewnbynnu'r rhaglen adeiladu hysbys a disgwyliedig o 1996 i 2016. Seilir y rhaglen adeiladu ddisgwyliedig ar gyfradd gwblhau ar gyfataloedd o 490 annedd y flwyddyn. Adlewyrcha'r gyfradd hon y cyfnod 19 blynedd o 1981 i 2000 ac ystyrir felly ei bod yn adlewyrchu'r sail fwyaf cadarn ar gyfer rhagdybio gweithgareddau adeiladu yn ystod bywyd y cynllun.

2.3.5. Drwy fabwysiadu'r tybiaethau hyn, disgwylir i boblogaeth y fwrdeistref sirol gynyddu 10,143 o unigolion i gyfanswm o 140,375 erbyn 2016. Dangosir prif elfennau'r dybiaeth hon yn nhabl INT1 a dangosir lefel y newid mewn poblogaeth yn ffigwr INT1.

Tabl INT 1 Rhagolwg o'r Boblogaeth

1 Ffynhonnell Cwblhau Tai Disgwyliedig Cyngor Bwrdeistref Sirol Pen-y-bont ar Ogwr

Ffigwr INT 1 Newid Tybiedig yn y Boblogaeth

2.3.6. Disgwylir i broffil oed y fwrdeistref sirol newid yn weddol sylweddol yn ystod bywyd y cynllun a dangosir hyn yn ffigwr INT2. Disgwylir i ganran y boblogaeth sydd dros oedran ymddeol godi o 19.2% yn 1996 i 22.9% yn 2016, sy'n cynrychioli cynnydd net o 7,120 o unigolion. Ategir at boblogaeth sy'n heneiddio gan golledion disgwyliedig ym mhoblogaeth y grwpiau oedran iau. Disgwylir i'r boblogaeth yn y grŵp oedran 0-14 gwympo 4% yn ystod bywyd y cynllun. Bydd yr unigolion yn y band oedran economaidd weithredol 30-44 oed yn sefydlog. Fodd bynnag, disgwylir i'r boblogaeth hŵn sy'n economaidd weithredol dros 45 oed gynyddu 3,702 unigolyn.

Ffigwr INT 2 Newid yn y Boblogaeth yn ôl Band Oedran

2.3.7. Wrth i gyfanswm y boblogaeth gynyddu dros fywyd y cynllun, disgwylir i faint cyfartalog cartref fynd yn llai. Mae lleihad ym maint cartref yn duedd cenedlaethol ac mae ffactorau fel mwy o bobl yn gwahanu, pobl yn byw'n hŵn a phobl ifanc sengl yn prynu eu cartrefi eu hunain yn brif ffactorau o ran esbonio'r tuedd hwn. Disgwylir i nifer y cartrefi ym mwrdeistref sirol Pen-y-bont ar Ogwr gynyddu 8,946 i 59,919 yn 2016. Mae'r rhagolwg hwn yn uwch na Rhagolwg Cartrefi 1994 y Swyddfa Gymreig; fodd bynnag, mae'r set hon o ragolygon yn mabwysiadu set wahanol o dybiaethau ac mae'n cychwyn o ddyddiad sylfaenol gwahanol, sy'n lleddfu cymariaethau uniongyrchol. Disgwyliodd y Swyddfa Gymreig i nifer y cartrefi yn y fwrdeistref sirol gynyddu 7,000 rhwng 1996 a 2016.

2.3.8. Wedi dod i lefel briodol o boblogaeth ddisgwyliedig a thwf mewn cartrefi, mae angen ystyried ffyrdd i ddarparu ar gyfer y twf hwn. Fel a nodwyd eisoes, mae'r gallu i newid patrymau defnydd tir yn eithafol yng nghyd-destun y CDU yn gyfyng. Mae darnau mawr o dir wedi eu nodi eisoes yn y cynllun datblygu presennol a bydd llawer o'r rhain yn meddu ar ganiatâd cynllunio parod. Ni fyddai'n ddoeth diddymu'r caniatâd hwn o ystyried yr adnoddau sydd ar gael i'r awdurdod cynllunio. Felly, disgwylir i'r rhan fwyaf o ddatblygiadau newydd ddigwydd ar safleoedd a ddyrannwyd yn y cynllun datblygu blaenorol. Y brif broblem yw diwallu'r gofynion tai ychwanegol tu hwnt i 2006 pan ddaw Cynllun Lleol Bwrdeistref Ogwr i ben. Ystyriwyd y mater hwn yn drylwyr yn y Strategaeth Defnydd Tir a gynhyrchwyd fel cefndir i'r Cynllun Datblygu Unedol hwn a theimlwyd mai'r dewis mwyaf cynaliadwy oedd gwasgaru'r twf ychydig.

2.3.9. Yn ei hanfod, ceisia'r ymagwedd hon ddiwallu'r gofyn am anheddau ychwanegol ar nifer o safleoedd a ddosberthir yn bennaf o fewn prif anheddiadau'r fwrdeistref sirol. Ni all yr ymagwedd hon o ddatblygu ar nifer fwy o safleoedd tai cymharol llai greu economïau graddfa i'r un raddfa â datblygu ar ychydig o safleoedd mawr. Gallai darparu cyfleusterau newydd a gwella'r rhwydwaith ffyrdd fod yn fwy cyfyng hefyd a gellir dadlau y bydd mwy o bwysau ar y cyfleusterau presennol. Fodd bynnag, mae bron i bob un o'r safleoedd newydd yn ychwanegol i'r rhai a nodwyd yn y cynllun datblygu blaenorol yn dir llwyd, yn dir llwyd sylweddol neu'n safleoedd trefol nad ydynt yn cael eu defnyddio ddigon o fewn y prif anheddiadau, yn unol ag egwyddorion cynaladwyedd.

2.3.10. Derbyniwn y gallai'r ymagwedd hon roi mwy o bwysau ar yr isadeiledd presennol. Fodd bynnag, byddai llawer yn dibynnu ar leoliad a nodweddion y safleoedd dan sylw. Drwy ganolbwyntio twf ar y prif ardaloedd trefol, gellid rhoi'r nifer gymharol isel o anheddau ychwanegol ar safleoedd tir llwyd heb newid cymeriad yr amgylchedd yn fawr iawn. Pe bai'r safleoedd hyn wedi eu lleoli'n strategol yn agos i'r cyfleusterau sy'n bodoli eisoes a'r prif ffyrdd, byddai eu heffaith ar yr amgylchedd ehangach yn fach.

2.3.11. Arweinia hyn at y Strategaeth Defnydd Tir, sef:-

GWASGARU DATBLYGIADAU NEWYDD YN Y PRIF ARDALOEDD TREFOL, LLE'N BOSIBL AR DIR TREFOL GWAG NEU DIR NAD YW'N CAEL EI DDEFNYDDIO DIGON A GWNEUD Y MWYAF O SAFLEOEDD DATBLYGU A BENODWYD EISOES.

2.3.12. Mae'r Cyngor wedi ystyried y cyngor a geir ym Mholisi Cynllunio Cymru (2002) (paragraff 2.10) a NCT CC(C)20 - 'Yr Iaith Gymraeg - Cynlluniau Datblygu Unedol a Rheoli Cynllunio'. Nid yw'n ystyried bod yna gymunedau yn y fwrdeistref sirol lle mae'r defnydd o'r iaith Gymraeg yn rhan o gyfansoddiad cymdeithasol y cymunedau at ddibenion creu polisi cynllunio strategol neu fanwl.

2.4. Gwerthusiad Cynaladwyedd

2.4.1. Er mwyn helpu i sicrhau bod egwyddorion datblygiad cynaliadwy'n cael eu hystyried ac yn cael blaenoriaeth ddilys, mae cyngor y Llywodraeth yn argymell bod awdurdodau cynllunio lleol yn asesu effaith amgylcheddol eu polisïau. Gwneir hyn orau drwy werthuso cynaladwyedd y cynllun. Byddai'r ymarfer hwn yn helpu i sicrhau bod nodau polisi wedi eu hamlinellu'r glir hefyd a bod yr holl opsiynau wedi eu nodi a'u hasesu.

2.4.2. I fod yn effeithiol, dylid integreiddio'r gwerthusiad i mewn i bob cam o'r broses creu cynlluniau. Mae gwerthusiad cynaladwyedd y cynllun hwn yn adlewyrchu hyn, gan fod pob cam o'r gwaith cynhyrchu hyd yma ac a amlinellwyd yn flaenorol, wedi bod yn destun gwerthusiad cynaladwyedd.

2.5. Strategaethau Perthynol

2.5.1. Mae deddfwriaeth y Llywodraeth yn gosod dyletswydd ar awdurdodau unedol yng Nghymru i baratoi strategaethau cymunedol i hybu neu wella lles economaidd, cymdeithasol ac amgylcheddol eu hardaloedd ac i gyfrannu at gyflawni datblygiad cynaliadwy yn y DU.

2.5.2. Esbonia cyfarwyddyd a gafwyd gan Gynulliad Cenedlaethol Cymru sut ddylai'r Cyngor adeiladu ar y gwaith a wnaed eisoes ar fentrau fel cynllunio corfforedig a chymunedol, adfywio, cynhwysiad cymdeithasol a datblygiad cynaliadwy er mwyn datblygu ei strategaeth gymunedol. Dylai'r strategaeth ddarparu fframwaith strategol ar gyfer holl gynlluniau a strategaethau eraill y fwrdeistref sirol, er mwyn i bobl weld perthnasedd y cynlluniau hynny a'u cyfraniad i'r Strategaeth Gymunedol. Mae polisïau a chynigion gofodol y CDU yn bwysig iawn i'r Strategaeth Gymunedol y mae'r Cyngor yn ei pharatoi ar hyn o bryd. Yn yr un ffordd, wrth i'r strategaeth gymunedol gael ei llunio, bydd cynigion a thargedau perthnasol a fydd yn cael effaith uniongyrchol ar ddefnydd tir yn y dyfodol, yn helpu i arwain arolwg o'r CDU yn y dyfodol.

2.5.3. Wrth ganlyn ei ymroddiad i ddatblygiad cynaliadwy, mae'r Cyngor Bwrdeistref Sirol, yn debyg i bob awdurdod lleol arall yn y Deyrnas Unedig, wedi cynhyrchu strategaeth agenda 21 leol sy'n cwmpasu egwyddorion datblygiad cynaliadwy. Mae'r Strategaeth Agenda 21 Leol yn ddogfen helaeth nad yw'n seiliedig ar ddefnydd tir sy'n cyd-fynd â pholisïau defnydd tir y CDU.

2.5.4. Hefyd, cynhyrchwyd nifer o strategaethau eraill gan y Cyngor sy'n dylanwadu'n uniongyrchol ar y CDU i raddau. Maent fel a ganlyn:-

• Strategaeth Adfywiad Economaidd Cynaliadwy i Fwrdeistref Sirol Pen-y-bont ar Ogwr;
• Strategaeth Cludiant;
• Strategaeth Cefn Gwlad a Rhaglen Weithredu Integredig;
• Strategaeth Treftadaeth Adeiledig;
• Cynllun Rheoli'r Parth Arfordirol;
•  Cynllun Gweithredu Bioamrywiaeth Lleol;
• Arolygon Ansawdd Awyr Lleol;
• Strategaeth Lleihau Troseddu;
• Strategaeth Twristiaeth Sir Pen-y-bont ar Ogwr; a'r
• Strategaeth Tai;

ynghyd â strategaethau adfywio penodol sy'n perthyn i:-

• Borthcawl;
• Cwm Garw;
• Canol tref Pen-y-bont ar Ogwr;
• Coridor yr M4;
• Cwm Llynfi;
• Cwm Ogwr; a
• Chymuned Cynffig.

2.5.5. Hefyd, mae Papur Gwyn y Llywodraeth sef 'Dyfodol Cludiant' a chyhoeddiad y cyn Swyddfa Gymreig 'Cludo Cymru i'r Dyfodol' yn nodi llunio cynlluniau cludiant lleol a fydd yn cwmpasu, ymysg eraill, cynlluniau cymudo gwyrdd a theithiau diogel i ysgolion.

<< Pennod flaenorol | Pennod nesaf >>