15. ADFYWIAD

15.1. Cyfiawnhad o Bolisi Rhan 1

15.1.1. Mae strategaeth adfywio'n ffordd o weithredu polisïau a chynigion y CDU yn gynhwysfawr a manwl mewn lleoliad penodol. Yn aml, hybir hi'n effeithiol drwy bartneriaeth o fuddiannau yn y sector cyhoeddus a phreifat/masnachol, ynghyd â swm sylweddol o fuddsoddiad ariannol ac adnoddau oddi wrth bawb dan sylw, yn seiliedig ar raglenni ariannu cytunedig. Bydd strategaeth adfywio wedi cael cefnogaeth gyhoeddus gyffredinol hefyd drwy broses o gyfranogiad a chynnwys y gymuned.

15.1.2. Felly, gall strategaeth adfywio gael cyfnod cyflwyno a gweithredu hir iawn. Bydd yn delio â materion fel gwella'r amgylchedd corfforol a diwylliannol, datblygiad cymunedol, adeiladu a chynnal hyder busnesau, denu buddsoddiad newydd, ailddiffinio delwedd ardal ac adfywio diddordeb a balchder y cyhoedd yn yr ardal.

15.1.3. Fodd bynnag, mae'n hawdd ei pheryglu drwy ddatblygiad amhriodol sy'n gwrthwynebu neu sy'n difetha dewisiadau ar gyfer datblygiadau cynlluniedig. Cynlluniwyd polisi 21 i atal hyn.

Rhan 2

15.2. Cyflwyniad

15.2.1. Mae adfywio'n ymwneud ag ardaloedd trefol a gwledig a gellir ei ddiffinio fel proses o fuddsoddi mewn ardal lle mae neu lle gwelwyd dirywiad amlwg er mwyn gwella'r amgylchedd corfforol, economaidd a chymdeithasol. Gall buddsoddi mewn cludiant, cyflogaeth, tai, manwerthu, twristiaeth a'r amgylchedd arwain at adfywio ardal. Rhaid ystyried adfywiad felly dan bynciau defnydd tir y CDU. Yn ychwanegol, gall buddsoddi mewn cyflogaeth, sgiliau addysgol ac adnoddau dynol arwain at adfywio ardal.

15.2.2. Hybir adfywiad yn fwyaf effeithiol drwy bartneriaeth o fuddiannau o'r sector cyhoeddus a phreifat/masnachol, ynghyd â swm sylweddol o fuddsoddiad ariannol ac adnoddau oddi wrth bawb dan sylw, yn seiliedig ar raglenni ariannu cytunedig. Rhaglenni buddsoddiad cyfalaf yw'r arf ariannu a ddefnyddir i drefnu adeiladu ac ariannu gwaith adfywio, er y mae'n rhaid cofio bod y cyllid hwn yn dibynnu ar gymorth grant o ffynonellau Ewropeaidd a chenedlaethol.

15.2.3. Bydd sefydlu partneriaeth strategol rhwng asiantaethau cyhoeddus, preifat a gwirfoddol yn allweddol i wireddu mentrau adfywio ardal. Mae rôl y gymuned wrth gynllunio ac adfywio ardal yn bwysig er mwyn i fentrau gael eu derbyn gan y cyhoedd.

15.2.4. Yn olaf, mae'r Llywodraeth yn ystyried adfywiad corfforol, sy'n cynnwys ailddefnyddio tir a ddatblygwyd eisoes, fel nod allweddol o ran creu patrwm mwy cynaliadwy o ddatblygu. Mae'r Llywodraeth yn cefnogi canolbwyntio datblygiadau ar gyfer defnydd sy'n creu nifer fawr o deithiau mewn lleoliadau sydd â chludiant cyhoeddus da, er enghraifft yng nghanol trefi. Y dewis cyffredinol yw datblygu tir o fewn ardaloedd trefol, yn enwedig ar safleoedd 'tir llwyd' a ddatblygwyd eisoes, cyn ystyried datblygu safleoedd tir glas.

15.2.5. Mae nodau allweddol yn cynnwys:-

Safbwynt strategol

15.2.6. Mae'n hanfodol i'r Cyngor gynnal fframwaith strategol ar gyfer adfywiad lle gellir canlyn rhaglenni thematig ac sy'n canolbwyntio ar ardal. Dylai unrhyw fframwaith strategol geisio:-

• hybu ymagwedd gyfannol at adfywio ac ymdrin â'r ystod eang o faterion economaidd, cymdeithasol ac amgylcheddol sy'n wynebu cymunedau lleol;

• nodi nodau a blaenoriaethau strategol;

• integreiddio strategaethau a chynlluniau allweddol eraill y Cyngor (gan gynnwys y Strategaeth Datblygiad Economaidd Cynaliadwy, y Strategaeth Addysg, y Cynllun Gwasanaethau Plant, y Cynllun Gofal Cymdeithasol, y Strategaeth Tai a'r Cynllun Gweithredol a'r Strategaeth Lleihau Troseddu);

• adeiladu ar weithgareddau adfywio cyfredol;

• ystyried galwadau a gofynion newidiol rhaglenni ariannu allanol;

• sefydlu cynlluniau gweithredu ag adnoddau ac amserlenni clir er mwyn gweithredu ac arolygu.

Cydlyniad mewnol

15.2.7. Bydd y Cyngor yn trefnu a chydlynu gweithgareddau adfywio'n fewnol ar draws ei gyfarwyddiaethau a meysydd gwasanaeth traddodiadol drwy:-

• dargedu adnoddau, gan gynnwys amser staff, ar flaenoriaethau strategol, yn enwedig mewn perthynas ag ardaloedd daearyddol;

• rheoli lefel yr adnoddau, yr ystod o arbenigedd a'r amser sydd ei angen i gynnal lefel uchel o weithgarwch ar fentrau adfywio;

• rheoli cyllidebau i hwyluso gwaith rhyng-gyfarwyddiaeth a defnyddio cyllid allanol.

Cydlyniad allanol

15.2.8. Mae adfywiad llwyddiannus yn mynnu ystod o fuddsoddiadau na all unrhyw un asiantaeth na sector eu darparu. Er mwyn taclo'r problemau a chyflwyno digon o adnoddau, bydd y Cyngor Bwrdeistref Sirol yn gweithio mewn partneriaeth ag asiantaethau eraill. Bydd hyn yn cynnwys:-

• adnabod partneriaid 'strategol' y Cyngor;

• datblygu ymagwedd o bartneriaeth;

• cynnwys datblygwyr, buddsoddwyr, tirfeddianwyr a'r sector gwirfoddol yn y strategaethau adfywio;

• cyd-drefnu â chynghorau cyfagos.

Cynnwys y gymuned

15.2.9. Cydnabyddir bod cynnwys y gymuned yn elfen allweddol o adfywiad llwyddiannus. Mae'n cynnwys:-

• penderfynu beth yw 'cynnwys y gymuned' mewn cyd-destunau gwahanol;

• adnabod pwy sy'n cynrychioli'r gymuned;

• cynnwys grwpiau dan anfantais/a eithrir;

• cynnal rôl tymor hir y gymuned leol;

• cysoni agenda'r gymuned ac agenda'r Cyngor;

• nodi'r gofynion amser ac adnoddau ar y Cyngor wrth geisio cynnwys cymunedau lleol mewn mentrau adfywio.

15.3. Strategaethau Adfywio yn y Fwrdeistref Sirol

15.3.1. Lluniwyd nifer o strategaethau ar gyfer bwrdeistref sirol Pen-y-bont ar Ogwr gyda'r nod o adfywio ardaloedd penodol. Gwelir hyn fel elfen hanfodol o wella ansawdd bywyd drwy wella dymunoldeb cyffredinol y fwrdeistref fel lle i fyw, gweithio, siopa ac ymlacio ynddo.

15.4. Strategaeth Adfywio Canol Tref Pen-y-bont ar Ogwr

15.4.1. Yn 1995, mewn ymateb i'r cyfle a gafwyd gan rwydwaith ffyrdd gwell a phryderon nad oedd canol y dref yn cyrraedd ei photensial llawn, comisiynodd Cyngor Bwrdeistref Ogwr a Chyngor Sir Morgannwg Ganol Ove Arup and Partners i wneud arolwg cynhwysfawr o'i photensial economaidd ac adfywio.

15.4.2. Etifeddodd Cyngor Bwrdeistref Sirol Pen-y-bont ar Ogwr yr astudiaeth yn 1996. Cadarnhaodd y canlyniadau fod potensial i hybu adfywiad canol y dref. Lluniodd Ove Arup strategaeth adfywio eang felly i gefnogi datblygiad safleoedd newydd, cynigion ar gyfer rheoli traffig, gwelliannau amgylcheddol ac ymagwedd ddiwylliannol.

15.4.3. Teimlwyd bod hybu canol y dref yn gofyn am raglen gyd-drefnedig o fuddsoddiad cyhoeddus a phreifat, gyda'r nodau canlynol:-

• Gwella amgylchedd canol y dref;

• Cynnal hyder busnesau;

• Denu buddsoddiad newydd;

• Ailddiffinio delwedd canol y dref.

15.4.4. Cynhyrchwyd cynllun gweithredu ac ariannu. Mae llwyddiant rhaglen adfywio'n gofyn am ymagwedd o bartneriaeth er mwyn sicrhau ystod eang o ffynonellau ariannu, ynghyd ag adnoddau a rennir. Gwelwyd tystiolaeth o hyn pan benodwyd swyddog prosiectau adfywio ar gyfer canol tref Pen-y-bont ar Ogwr ym mis Medi 2002 sy'n swydd a ariennir gan y Cyngor ac Awdurdod Datblygu Cymru.

15.4.5. Mae strategaeth ddatblygu arfaethedig canol y dref yn cynnwys datblygu safleoedd strategol - Elders Yard, ardal Nolton Street, safle British Telecom a'r gerddi ar osod. Mae prosiectau eraill yn canolbwyntio ar brosiectau diwylliannol ac amgylcheddol, gan gynnwys creu amgylchedd wedi ei bedestreiddio a rheoli traffig. Manylir ar y safleoedd datblygu a'r prosiectau arfaethedig dan y penodau pwnc perthnasol, yn benodol manwerthu, cludiant ac adfywiad.

15.5. Strategaeth Coridor yr M4 Pen-y-bont ar Ogwr

15.5.1. Ym mis Mai 1996, cynhyrchodd yr ymgynghorwyr cynllunio a datblygu EDAW strategaeth datblygiad economaidd ar gyfer ardal coridor yr M4. Mae'n cwmpasu ardal sy'n estyn o Bencoed yn y dwyrain ar hyd y coridor gan ddod i ben ym Mhîl/Corneli yn y gorllewin. Mae'r astudiaeth yn canolbwyntio ar y sector diwydiannol a phrosiectau a rhaglenni cysylltiedig. Seilir y strategaeth ar ystod eang o raglenni, sy'n cynnwys:-

• safleoedd ac ystadau diwydiannol;

• datblygu a hyfforddi busnesau;

• twristiaeth; a

• chanol tref Pen-y-bont ar Ogwr a chanolfannau cyfagos.

15.5.2. Mae'r strategaeth yn gwneud argymhellion ac yn nodi prosiectau i'w gweithredu rhwng 1996-2006 gyda phartneriaid allweddol yn y sectorau preifat, cyhoeddus a gwirfoddol. Mae gwireddu potensial ardaloedd coridor yr M4 yn dibynnu ar sicrhau bod rhaglen weithredu briodol yn ei lle i reoli a chydlynu'r strategaeth. Mae'r mentrau arfaethedig ym meysydd safleoedd ac ystadau diwydiannol, adnoddau dynol a chwmnïau, twristiaeth a gwelliannau i ganolfannau cymdogaethol, gan gynnwys Pencoed, Abercynffig, Pîl a Mynydd Cynffig.

15.5.3. Ystyrir y mentrau a'r materion argymelledig sy'n deillio o'r strategaeth ymhellach yn y penodau pwnc perthnasol, yn enwedig diwydiant a chyflogaeth.

15.6. Strategaeth Adfywio Tref Lan Môr Porthcawl

15.6.1. Ym mis Gorffennaf 2003, penododd y Cyngor Bwrdeistref Sirol CDN Planning, ar y cyd â Halcrow and Alder King, i baratoi pecyn gwybodaeth datblygu ar gyfer ardal adfywio Porthcawl, fel a ddyrannwyd gan bolisi REG3(2) y CDU. Pwrpas y pecyn gwybodaeth yw arwain datblygiad cynhwysfawr o'r safle cyfan a sicrhau bod yna fframwaith gweithredu, o fewn o fframwaith polisi, fel a osodir allan yn y CDU. Bwriada'r Cyngor fabwysiadu'r pecyn gwybodaeth fel cyfarwyddyd cynllunio atodol i'r CDU. Nodau'r pecyn gwybodaeth fydd:-

• darparu cyfarwydd manwl am faterion cynllunio ac eraill o fewn ardal adfywio Porthcawl; drwy brif gynllun;

• sefydlu canllawiau cynllunio a dylunio trefol; a

• darparu cyd-destun ar gyfer datblygu a phenderfynu ar geisiadau cynllunio.

15.6.2. Bydd y pecyn yn gosod allan y gofyn i ddatblygu'r ardal adfywio'n gynhwysfawr ond yn raddol; wrth gynnwys polisi R8(5) y cynllun sy'n dyrannu tir ar gyfer siop fwyd ym maes parcio Hillsboro Place a dyraniad tai dan bolisi H1(58). Disgwylir i'r rhain gyd-fynd ag amcan cyffredinol polisi TM7 sef gwella a datblygu Porthcawel fel prif dref lan môr y fwrdeistref sirol.

15.6.3. Bydd y pecyn gwybodaeth drafft yn destun ymgynghoriad cyhoeddus helaeth yn ystod ac ar ôl ei baratoi a disgwylir i'r Cyngor ei fabwysiadu yn hwyr yn 2004.

15.7. Strategaeth Adfywio Cwm Garw

15.7.1. Yma, seilir y strategaeth ar weithredu cynlluniau mawr a bach a anelir at wella'r amgylchedd yn raddol.

15.7.2. Prif linynnau'r strategaeth yw:-

• cwblhau cynllun adfer Cwm Garw - cynllun adfer tir o bwys a ariennir gan ADC â chost dybiedig o £14m. Ei bwrpas yw adfer y cwm a'r mynydd yn gyfan gwbl;

• gweithredu Strategaeth Werdd Cwm Garw - strategaeth ar gyfer gwelliannau amgylcheddol yng Nghwm Garw sy'n cynnwys adnabod prosiectau a fydd yn gwella a glasu'r cwm;

• gweithredu Strategaeth Werdd Betws - menter o welliannau amgylcheddol a gyfeirir at bentref Betws yn benodol;

• hybu cynlluniau hamdden a thwristiaeth yn seiliedig ar dreftadaeth Cwm Garw, gan gynnwys cyflwyno trên stêm gan Gwmni Rheilffordd Cymoedd Pen-y-bont, â chysylltiadau i Barc Gwledig Bryngarw;

• estyn grantiau gwelliannau masnachol er mwyn uwchraddio eiddo amgylcheddol a manwerthu.

15.7.3. Yn debyg i strategaethau eraill, manylir ar fentrau sydd â goblygiadau defnydd tir dan y penodau pwnc perthnasol.

15.8. Strategaeth Adfywio Cwm Llynfi

15.8.1. Targedir y strategaeth yn bennaf at addysg gymunedol, datblygiad cymdeithasol a mentrau cyflogaeth.

15.8.2. Ceir 5 thema strategol a sefydlwyd fel agenda weithredu:-

• Datblygu sylfaen sgiliau addysgol trigolion y cwm;

• Datblygu safleoedd diwydiannol/masnachol lleol a sefydlu partneriaethau gyda diwydiannau lleol yn unol â'r Strategaeth Datblygiad Economaidd Cynaliadwy;

• Datblygu gallu'r gymuned o fewn cymdogaethau lleol;

• Datblygu cynllun gweithredu i ymdrin â phroblemau cymdeithasol y cwm ac, yn arbennig, pobl ifanc sydd wedi colli diddordeb; a

• Datblygu balchder cyfiawn mewn tai a'r tirlun amgylcheddol trefol a gwledig.

15.8.3. Cynigir nifer o fentrau i symud y themâu strategol yn eu blaen a chychwynnwyd ar rai ohonynt eisoes. Seilir cyllid ar y cyfle sydd ar gael i'r ardal am gais i gael cyllid gan y Swyddfa Gymreig a chyllid Ewropeaidd. Gan fod mentrau'r strategaeth yn gymdeithasol eu natur yn bennaf, ymdrinnir â materion sydd â goblygiadau defnydd tir yn y bennod am gyfleusterau a gwasanaethau cymdeithasol a chymunedol.

15.9. Strategaeth Adfywio Cwm Ogwr

15.9.1. Ar 4 Mehefin 1997, cymeradwyodd y Cyngor arian dirprwyedig o'r Cynllun Datblygu Strategol am swm o £10,000 ar gyfer astudiaeth o strategaeth adfywio Cwm Ogwr. Comisiynodd yr Awdurdod Groundwork Pen-y-bont i gynhyrchu astudiaeth ddrafft i gynnwys y materion canlynol:-

• cadwraeth natur;

• cadw a gwella tirweddau;

• mynediad a hamdden;

• economi a rheoli tir;

• cludiant a thraffig;

• adfywio canol y pentref;

• materion cymdeithasol;

• ymwybyddiaeth ac addysg amgylcheddol.

15.9.2. Mae Groundwork wedi paratoi strwythur drafft ar gyfer paratoi'r astudiaeth yn seiliedig ar gynhwysiad y gymuned. Mae'r strwythur yn cynnwys rhaglen am ymgynghoriad cyhoeddus. Un o nodau datganedig y strategaeth yw llywio gweithrediadau asiantaethau yn y bartneriaeth.

15.10. Strategaeth Adfywiad Economaidd Cymuned Cynffig

15.10.1. Mae ardal y strategaeth yn cwmpasu cymunedau Mynydd Cynffig, Pîl a Chorneli. Anela'r strategaeth at ddarparu ymateb cynhwysfawr i'r problemau cymhleth o ddiweithdra uchel, amddifadedd a phroblemau cymdeithasol sy'n bodoli yn y cymunedau hyn.

15.10.2. Prif nodau'r strategaeth yw:-

• ymdrin ag eithriad cymdeithasol, yn enwedig ymysg pobl ifanc sydd wedi colli diddordeb;

• gwella sgiliau'r boblogaeth leol a natur gystadleuol busnesau bach a chanolig lleol;

• creu cyfleoedd gwaith newydd a chynaliadwy ar gyfer pobl leol; a

• gwella cyflwr corfforol Ystad Ddiwydiannol Village Farm.

15.10.3. Cynigia'r strategaeth ymateb integredig at angen lleol diffiniedig - hyfforddiant a gwaith. Ceisia integreiddio ystod eang o fentrau cymunedol er mwyn creu sylfaen ar gyfer strategaeth adfywio yn yr ardal.

15.10.4. Disgwylir i'r strategaeth greu buddion economaidd a gwaith drwy:-

• sefydlu isadeileddau hyfforddiant lleol,

• adeiladu canolfan fenter gymunedol,

• uwchraddio Ystad Ddiwydiannol Village Farm a'i gwneud yn lleoliad dymunol i fusnesau bach a chanolig.

Daw'r strategaeth â phartneriaid allweddol at ei gilydd ac mae ganddi gefnogaeth ystod eang o gyrff cyhoeddus, preifat a gwirfoddol.

15.11. Strategaeth Adfywio Canol Tref Maesteg

15.11.1. Yn 2000, comisiynodd Cyngor Bwrdeistref Sirol Pen-y-bont ar Ogwr ac Awdurdod Datblygu Cymru strategaeth canol tref a chynllun gweithredu ar gyfer adfywio canol tref Maesteg. Mae adroddiad URBED yn cynnwys strategaeth adfer yn seiliedig ar 5 rhaglen ddatblygu, fel a ganlyn:

• Hawdd mynd at ganol y dref, gan gynnwys lleihau tagfeydd traffig, symleiddio parcio a'i gwneud yn haws i bobl gerdded a beicio yn y dref a gwneud y mwyaf o'r cyswllt trên i Gaerdydd a Phen-y-bont

• Balchder yn y dref, gan gynnwys glasu'r strydoedd, penodi ardal gadwraeth a gwella'r amgylchedd er mwyn gwneud y mwyaf o gymeriad Edwardaidd y dref

• Canol y dref, canolbwyntio gwelliannau ar adeiladau allweddol, gan gynnwys neuadd y dref a'r farchnad

• Datblygu busnes a

• Menter gymunedol

15.11.2. Ers cyhoeddiad yr adroddiad, mae ymdrechion i gael adnoddau ar gyfer y gwelliannau a amlygwyd yn y strategaeth wedi bod yn llwyddiannus ac maent wedi arwain at benodi swyddog prosiectau adfywio penodol ar gyfer canol tref Maesteg. Yn gweithio mewn partneriaeth ag Awdurdod Datblygu Cymru, Llywodraeth Cynulliad Cymru, CADW a'r Lotri Treftadaeth, mae'r Cyngor Bwrdeistref Sirol yn datblygu pecyn o brosiectau gwella sy'n dangos ymagwedd integredig a chyfannol at adfywiad corfforol y dref.

15.11.3. Yn 2003, cynhyrchwyd strategaeth ardaloedd cyhoeddus a phrif gynllun sy'n amlinellu cynigion i wella strydoedd a lleoedd ledled canol y dref. Cynlluniwyd y cam cyntaf o welliannau - glasu Commercial Street - i ddechrau yng ngwanwyn 2004. Mae ystod o anogaethau ariannol mewn lle i annog busnesau a deiliaid eraill yng nghanol y dref i fuddsoddi yn eu heiddo. Mae astudiaethau dichonoldeb i botensial safleoedd ac adeiladau allweddol gyda'r bwriad o sicrhau dyfodol cynaliadwy ar eu cyfer wedi cychwyn hefyd.

15.12. Gweithredu

15.12.1. Ynghyd â pholisïau sy'n perthyn i bynciau penodol, ystyrir bod y canlynol yn hanfodol er mwyn helpu i weithredu cynigion, cynlluniau a phrosiectau strategaethau adfywio amrywiol y fwrdeistref sirol:-

15.12.2. CYNLLUNIAU ADFYWIO

POLISI REG1

CANIATEIR DATBLYGIAD SY'N HELPU I WEITHREDU CYNLLUNIAU ADFYWIO A GWELLIANNAU AMGYLCHEDDOL, YN ENWEDIG LLE BYDD YN ARWAIN AT:-

1. AILDDEFNYDDIO AC ADFER TIR LLWYD AC ADEILADAU GWAG, NAD YDYNT YN CAEL DIGON O DDEFNYDD;

2. GWELLA ANSAWDD YR AMGYLCHEDD TREFOL, YN ENWEDIG FFYNIANT, DICHONOLDEB A DYMUNOLDEB CANOL TREFI PEN-Y-BONT, PORTHCAWL A MAESTEG;

3. GWELLA CYFLEUSTERAU PRESWYL, MASNACHOL, HAMDDEN A THWRISTIAETH;

4. DEFNYDD MWY EFFEITHIOL AC EFFEITHLON O'R RHWYDWEITHIAU FFYRDD A CHLUDIANT CYHOEDDUS PRESENNOL.

15.12.3. Mae gweithredu cynlluniau a mentrau a geir yn y strategaethau adfywio'n arwain at welliannau yn yr amgylchedd trefol. Cydnabyddir bod hyn yn brif ffactor sy'n denu ymwelwyr a buddsoddiad mewnol. Mae adfywio tir gwag yn gofyn am waith clirio ac ailddatblygu sy'n arwain at dirlunio, creu mannau wedi eu pedestreiddio, coed, palmentydd a seddi. Mae ailddefnyddio safleoedd tir llwyd yn rhoi cyfle i ddarparu cyfleusterau newydd a hawdd mynd atynt ar ffurf datblygiadau defnydd cymysg, gan gynnwys tai, a defnyddiau masnachol a manwerthu. Canlyniad hyn yw amgylchedd o ansawdd uchel yn yr ardaloedd trefol hŵn ac ar ystadau tai ac felly gwella ansawdd bywyd yn y fwrdeistref sirol. Lle mae polisïau REG1 a REG3 (isod) yn nodi pum safle adfywio 'allweddol', pob un ohonynt o fewn neu ger ardaloedd trefol presennol y fwrdeistref sirol, nid yw'n bosibl i gyfleoedd eraill am adfywio tir mewn ardaloedd mwy gwledig y fwrdeistref sirol yn ystod bywyd y CDU. Defnyddir darpariaethau polisi REG1 yn yr achlysuron hyn, os byddant yn codi. Dylid nodi bod y cyfarwyddyd cynllunio Cymreig diweddaraf yn cynnwys diffiniad clir o 'dir a ddatblygwyd eisoes (neu dir llwyd)' sy'n perthyn i leoliadau trefol a gwledig (cyfeirier at adran 2.7 Polisi Cynllunio Cymru). Defnyddir hwn wrth weithredu polisi REG1.

15.12.4. DATBLYGIAD NAD YW'N UNOL Â STRATEGAETH ADFYWIO

POLISI REG2

NI CHANIATEIR DATBLYGIAD SY'N DEBYGOL O GAEL EFFAITH ANNERBYNIOL NEU NEGYDDOL AR WEITHREDIAD STRATEGAETH ADFYWIO.

15.12.5. Mae strategaethau adfywio'n ffurfio gweledigaeth gynhwysfawr ar gyfer dyfodol yr ardaloedd dan sylw. Byddwn yn gwrthwynebu cynigion am ddatblygiad neu weithrediad sy'n groes i nodau ac amcanion strategaeth neu sy'n atal gweithrediad rhaglen. Mae enghreifftiau o gynigion annerbyniol yn ddatblygiadau sy'n arwain at fwy o draffig, cynigion tu allan i drefi a allai beryglu ffyniant canol trefi a dyluniad o ansawdd isel. Monitrir effaith gynyddol datblygiadau newydd bach a newidiadau mewn defnydd hefyd er mwyn sicrhau nad oes effeithiau drwg yn y tymor hir. Gallai fod angen gwrthod y datblygiadau hyn hefyd os ydynt yn debygol o beryglu strategaeth.

15.12.6. SAFLEOEDD ADFYWIO A DEFNYDD CYMYSG ALLWEDDOL

POLISI REG3

CYNIGIR DATBLYGIAD CYNHWYSFAWR O'R SAFLEOEDD CANLYNOL FEL RHAN O ADFYWIAD YR ARDALOEDD NEU AR GYFER CYNLLUNIAU DEFNYDD CYMYSG PRIODOL. BYDD GWEITHREDIAD POB UN YN UNOL Â PHECYN DATBLYGU A/NEU GYTUNDEBAU CYNLLUNIO/ FFYRDD PRIODOL. RHAID I'R CYNGOR BWRDEISTREF SIROL GYTUNO AR Y RHAIN CYN I'R DATBLYGIAD GYCHWYN:-

1. SAFLE HEN OLCHDY MAESTEG A'R TIR GERLLAW; (Cyswllt â’r Map 32)

2. TIR RHWNG Y PORTHLADD A BAE TRECCO, PORTHCAWL; (Cyswllt â’r Map 37)

3. TIR I'R GORLLEWIN O HEOL MAESTEG, TONDU; (Cyswllt â’r Map 15)

4. PWLL-Y-WAUN, PORTHCAWL; (Cyswllt â’r Map 29)

5. GOGLEDD O LOCKS LANE, PORTHCAWL. (Cyswllt â’r Map 29 Gorllewin)

15.12.7. Mae'r safleoedd allweddol uchod yn cynnig cyfle ar gyfer cynlluniau cynhwysfawr a fydd yn gwella amgylchedd ac economi'r fwrdeistref sirol drwy greu swyddi, denu ymwelwyr neu ddarparu mannau hamdden. Bydd angen gwaith ar rai safleoedd ac adleoli defnyddiau presennol, bydd angen adfer tir ar eraill. Hybir eu potensial drwy baratoi pecyn datblygu neu gytundeb ffyrdd/cynllunio priodol. Dyma'r ffordd orau o ddatrys materion cynllunio, fel mynediad, defnydd cymysg, dyluniad trefol, bioamrywiaeth neu warchod adeiladau ac ardaloedd hanesyddol.

Safle Hen Olchdy Maesteg a Thir Gerllaw

15.12.8. Lleolir y safle hwn yn union i'r gogledd-ddwyrain o ganol tref Maesteg. Diffinnir ymylon gorllewinol a deheuol y safle gan yr hen reilffordd mwnau ond ni ddiffinnir y ffiniau gogleddol a dwyreiniol gan unrhyw nodweddion corfforol gan fod y tir yn dir adferedig agored, gan gynnwys safle'r hen olchdy. Ar hyn o bryd, dim ond rhan fach o gyfanswm y safle sy'n cael ei defnyddio. Ceir cae chwarae bach yng nghornel dde-orllewinol y safle sy'n cyffwrdd ar storfa dosbarthu glo. Mae llawer o'r safle yn cynnwys tipiau a adferwyd a rhostir agored.

15.12.9. Er mwyn adfer y safle'n foddhaol, byddai angen ailbroffilio a thirlunio'r tipiau a'r ochrau llethr. Byddai gofyn delio ag unrhyw fannau llygredig yn briodol hefyd. Ystyrir bod defnyddiau addysg, tai, diwydiant ysgafn a hamdden yn briodol ar gyfer y safle. Nodwyd ysgol gyfun newydd a chaeau chwarae fel prif ddefnydd ar gyfer rhan o'r safle. Bydd nifer y tai a'r diwydiant ysgafn a osodir ar y safle'n cael eu cyfyngu gan lefel y tir llygredig (os oes yna dir llygredig) ar y safle.

Tir rhwng y Porthladd a Bae Trecco, Porthcawl

15.12.10. Mae polisi REG3 (2) yn cefnogi datblygiad gweithgareddau twristiaeth/hamdden/adloniant/masnachol priodol a llety newydd fel rhan o gynigion ar gyfer ailddatblygiad Hillsboro Place, Salt Lake, Coney Beach a Sandy Bay ym Mhorthcawl. Disgwylir ymagwedd raddol. Bydd cyfarwyddyd cynllunio ategol ar ffurf pecyn gwybodaeth datblygu'n cael ei baratoi, mewn ymgynghoriad â'r perchnogion a phreswylwyr presennol, a'r cyhoedd a bydd yn manylu ar ofynion cynllunio a dylunio'r safle. Dylai elfennau twristiaeth/ hamdden/adloniant y datblygiad adlewyrchu nodau ehangach Polisi TM7 a fydd yn cynnwys llety i dwristiaid a fydd yn gwneud tref lan môr Porthcawl yn fwy dymunol i ymwelwyr ac yn estyn y tymor. Bydd y gweithgareddau masnachol newydd yn cynnwys datblygiad manwerthu, yn unol â pholisi R8(5). Bydd y dyraniad preswyl cyffredinol yn cael ei arwain gan bolisi H1(58). Bydd ailddatblygu'r ardal bwysig hon o Borthcawl yn cyfrannu at ailfywiogi'r gyrchfan fel prif dref lan môr yn ne Cymru.

Tir i'r Gorllewin o Heol Maesteg, Tondu

15.12.11. Bydd datblygu ac adfer y safle 'tir llwyd' hawdd mynd ato hwn yn cyflwyno 45hectar o dir ar gyfer amrywiaeth o ddefnyddiau economaidd buddiol, gan gynnwys datblygiad diwydiannol o fewn dosbarthiadau defnydd B1, B2, B8, tai, parc treftadaeth, gorsaf trosglwyddo gwastraff a ffyrdd newydd a fydd o fantais i'r gymuned leol hefyd drwy leddfu darn prysur o Heol Maesteg.

15.12.12. O safbwynt datblygiad economaidd, mae'r safle'n darparu cyfle datblygu a chysylltiadau cyfathrebu da â'r M4, cyswllt rheilffordd posibl ac amgylchedd o ansawdd uchel. Gall y safle ddenu nifer fawr o ddefnyddwyr diwydiannol llawn bri, mawr gyda'r potensial i greu nifer fawr o swyddi y mae mawr eu hangen.

15.12.13. Mae lleoliad canolog y safle yn y fwrdeistref sirol a'i hygyrchedd o ran ffyrdd a rheilffyrdd i gludo defnyddiau yn gwneud y defnydd o'r rhan hon o'r safle'n ddewis pwysig ar gyfer gorsaf trosglwyddo gwastraff domestig.

15.12.14. O ran hybu treftadaeth ddiwydiannol yr ardal, mae cyfle i ddarparu hamdden ffurfiol ac anffurfiol mewn cysylltiad â Gwaith Haearn Tondu, sy'n hen gofeb gofrestredig ac yn rhan annatod o barc treftadaeth arfaethedig. Yn ychwanegol, bydd llwybrau beicio ar y datblygiad yn ffurfio rhan o'r Llwybr Beicio Cenedlaethol a bydd hyn yn creu mwy o gyfle ar gyfer hamdden anffurfiol.

15.12.15. Mae'r safle'n cynnwys rhan o ardal gadwraeth Heol Derllwyn a bydd raid i unrhyw ddatblygiad, gan gynnwys datblygiad preswyl, ystyried y penodiad hwn, yn enwedig o ran dyluniad a defnyddiau.

Pwll-y-Waun, Porthcawl

15.12.16. Mae'r safle 4.5 hectar hwn yn cynnwys llyn Pwll-y-Waun tua gorllewin y safle y dylid ei gadw a'i wella gan unrhyw ddatblygiad ar y tir cyfagos tua dwyrain y safle a ddefnyddir fel porfa i geffylau ar hyn o bryd. Bydd ardaloedd coediog y safle'n caniatáu datblygu defnyddiau swyddfa bach B1 (0.7 hectar) mewn tir parc ynghyd â datblygiad preswyl cyfyng (rhyw 25 o anheddau) â man agored ger y llyn a'r coed. Bwriedir i'r datblygiad fynd yn ei flaen yn unol â phecyn gwybodaeth datblygu cytunedig yn unig.

15.12.17. Adlewyrchwyd yr agweddau uchod yn y defnyddiau safle penodol a ddyrannwyd ar gyfer y safle gan bolisïau eraill yn y CDU, sef polisïau RC9(10), E4(4)  a H1(88). Felly, mae cyfle ar y safle hwn i ddarparu cynllun defnydd cymysg o ansawdd uchel gan gynnwys datblygiadau gwaith a phreswyl sy'n cadw ac sy'n parchu buddiant cadwraeth natur y llyn tra'n diogelu a rheoli'r fioamrywiaeth ar y safle hwn.

Gogledd o Locks Lane, Porthcawl

15.12.18. Mae'r tir yn cynnwys 5.3 hectar o dir âr o fewn ardal drefol Porthcawl. Mae datblygiad preswyl i'r gogledd a'r de a chaeau chwarae i'r dwyrain. I'r gorllewin, mae'r tir yn cyffwrdd â Lock's Common, ardal bwysig sy'n estyn i'r môr. Mae'r safle'n caniatáu ar gyfer datblygiad preswyl a hamdden defnydd cymysg a fydd yn helpu i weithredu cynnig hamdden hir sefydlog ac felly bodloni anghenion hamdden ardal Porthcawl.

15.12.19. Adlewyrchwyd yr agweddau uchod yn y defnyddiau penodol a ddyrannwyd ar gyfer y safle gan bolisïau eraill y CDU, sef polisïau RC6(10) a H1(59). Darperir tai dim ond fel rhan o gynllun defnydd cymysg a sicrheir drwy gytundeb cynllunio priodol a fydd yn cynnwys datblygu o leiaf 2.7 hectar o dir at ddibenion hamdden ar ymyl ddwyreiniol y safle.

<< Pennod flaenorol | Pennod nesaf >>